Ысык-Көлдөгү эл аралык жарышка 5 млн доллар сарпталат
Ысык-Көлдө өтө турган UIM F1H2O дүйнөлүк чемпионатын уюштурууга болжол менен 5 млн АКШ доллары бөлүнөт. Туризмди өнүктүрүү мамлекеттик агенттигинин директору Эдуард Кубатов бул каражат мамлекеттик бюджеттен эмес, Суу-мотор спорту федерациясы жана эл аралык спорттук өнөктөштөр тарабынан каржыланарын билдирди.
Анын айтымында, өкмөттүн чыгымдары негизинен инфраструктураны жакшыртууга багытталат: жолдорду куруу, жарыктандыруу, автоунаа токтотмолору, жээк аймагын жана сейил бактарды өнүктүрүү иштерине жумшалат.
Чемпионат 31-июлдан 2-августка чейин Ысык-Көлдүн жээгинде өтөт. Бул Борбор Азияда биринчи жолу уюштурулуп жаткан UIM F1H2O этабы болуп саналат. Уюштуруучулар эл аралык командалардын жана ондогон пилоттордун катышуусун күтүшүүдө. Жарыш дүйнөнүн көптөгөн өлкөлөрүнө түз эфирде көрсөтүлөрү айтылууда.
Иш-чара коомчулукта кызуу талкуу жаратып, айрым экологдор көлдүн экосистемасына тийгизиши мүмкүн болгон терс таасирлер боюнча тынчсыздануусун билдиришкен. Алар Ысык-Көлдүн биосфералык аймак макамын эске алуу зарылдыгын белгилешүүдө.
Өз кезегинде уюштуруучулар жана мамлекеттик органдар экологиялык экспертизалар жүргүзүлгөнүн, жарыш көлгө олуттуу зыян келтирбейт деген корутунду алынганын билдиришти. Ошондой эле күйүүчү май же май төгүлүп кетсе, анын кесепеттерин тез арада жоюу боюнча атайын регламент каралганын айтышты.
Бул тема боюнча талкуулар парламентте да көтөрүлүп, бийлик өкүлдөрү бардык экологиялык талаптар сакталарын айтышкан. Ошол эле учурда Ички иштер министрлиги чемпионат тууралуу жалган же бурмаланган маалыматтарды таратуудан алыс болууга чакырды.
