Ысык-Көлдө ШКУга мүчө-мамлекеттердин медиафоруму өтүп жатат
Бүгүн, Ысык-Көл облусунда Маданият, маалымат жана жаштар саясаты министрлиги тарабынан уюштурулган Шанхай кызматташтык уюмуна мүчө-мамлекеттердин медиафоруму өтүп жатат.
Министрликтин маалыматына ылайык, медиафорум ШКУга мүчө-мамлекеттердин мамлекеттик органдарынын, алдыңкы ЖМКларынын, санарип платформаларынын жана эксперттик коомчулугунун өкүлдөрү — алты өлкөдөн 100гө жакын катышуучу катышууда.
Иш-чаранын негизги максаты — ШКУ өлкөлөрүнүн ортосундагы медиа кызматташтыкты бекемдөө, маалымат жана коммуникация тармагындагы өнөктөштүк байланыштарды өнүктүрүү, ошондой эле медиачөйрөнүн санариптик трансформациясы шартында бирдиктүү кесиптик диалогду калыптандыруу болуп саналат.
Министрлер кабинетинин төрагасынын орун басары Улан Маматканов медиафорумду ачып жатып, бүгүнкү күндө маалымат көз ирмемде тарап, коомдук пикирди гана калыптандырбастан, эл аралык процесстерге да түздөн-түз таасир этип жаткандыгын белгиледи.
“Улуттук кызыкчылыктарды коргоо, такталбаган маалыматтардын жайылышына бөгөт коюу жана киберкоопсуздукту камсыздоо маселелери бизден жоопкерчиликтүү мамилени, тыгыз кызматташууну жана биргелешкен чечимдерди иштеп чыгууну талап кылат”, - деди ал өз сөзүндө.
ШКУга мүчө-мамлекеттердин делегация башчылары маалыматтык кызматташтыкты өнүктүрүүнүн, медиамейкиндикте ишенимди бекемдөөнүн жана өлкөлөр ортосундагы кесиптик өз ара аракеттенүүнү кеңейтүүнүн маанилүүлүгүн баса белгилешти.
Форумдун алкагында инновациялык технологияларды киргизүү, санариптик платформалардын ролу жана өзгөрүп жаткан маалыматтык ландшафттагы кесиптик жоопкерчилик маселелери боюнча талкуулар уланууда.
