Такси айдоочулары лицензияны эми онлайн ала алышат
КРнын Ички иштер министрлиги жүргүнчүлөрдү ташуу ишмердүүлүгүн лицензиялоо боюнча санариптик система ишке киргизилгендигин маалымдады. Билдирүүгө караганда, эми такси айдоочулары жана юридикалык жактар лицензия алуу үчүн арыздарды онлайн тапшыра алышат.
Лицензия алуу үчүн - "МБанк", "Элдик" жана "Түндүк" мобилдик тиркемелеринен идентификациядан өтүп, электрондук арызды толтуруп, керектүү документтерди жүктөө жетиштүү болот. Лицензия берилгенден кийин анын маалыматтары мобилдик тиркемеде санариптик форматта жеткиликтүү болуп калат.
Эскерте кетсек, 2026-жылдын 1-июлунан тартып лицензиясы жок жүргүнчү ташыган жеке жактарга 7 500 сом, юридикалык жактарга 23 000 сом өлчөмүндө айып пул салынат.
Ушуга байланыштуу Ички иштер министрлиги бардык жүргүнчү ташуучуларды лицензияларын өз убагында алып, мыйзам талаптарын так сактоого чакырууда.
Лицензиянын акысы бир жылга жеке жактарга 500 сом, юридикалык жактарга 1000 сом. Лицензиясы жок айдоочуларга Телеграм каналдар, социалдык тармактар аркылуу кардар топтоого тыюу салынат. Тийиштүү уруксаты жок айдоочу кардар ташыса 7,5 миң сом, юридикалык жактар 23 миң сом айыпка жыгылат.
