40 көйгөйлүү турак жайдын ээлерине шайкештик актылары тапшырылды
Курулуш, архитектура жана турак жай-коммуналдык чарба министринин биринчи орун басары Болот Чолпонбаев Бишкектеги 38 көп кабаттуу турак жайдын жана Баткен облусунун Кызыл-Кыя шаарындагы 2 көп кабаттуу үйдүн жашоочуларына шайкештик актыларын тапшырды.
Аталган министрликтин маалыматына ылайык, бул иштер президент Садыр Жапаров берген тапшырманын негизинде жүргүзүлүүдө.
Жолугушууда Болот Чолпонбаев бул чечим жарандардын көп жылдан бери чечилбей келген турак жай маселелерин жөнгө салуудагы маанилүү кадам экенин айтты. Ал ошондой эле жашоочуларды куттуктап, тиешелүү документтерди расмий түрдө тапшырды.
Белгиленгендей, айрым турак жайлар 10–15 жыл мурда курулганы менен курулуш компаниялары тарабынан расмий пайдаланууга берилбей калган. Натыйжада батир ээлери ушул күнгө чейин турак жайларын өз атына каттай албай, документтерди алууда бир катар кыйынчылыктарга туш болуп келишкен. Мындан тышкары, алар электр энергиясы, жылуулук жана башка коммуналдык кызматтар үчүн көп жылдар бою коммерциялык тариф менен төлөп келишкен.
Жалпысынан 40 үйгө тиешелүү документтер тапшырылып, аларды мыйзамдаштыруу маселелерин чечүү багытында маанилүү кадам жасалганы айтылды.
Курулуш министрлиги көйгөйлүү көп кабаттуу турак жайларга байланышкан маселелерди чечүү иштерин мындан ары да улантарын билдирди.
