Азия өнүктүрүү банкы айыл чарба долбоорлоруна баа берди
23-июнда Азия өнүктүрүү банкынын өкүлдөрү Кыргызстанда ишке ашырылып жаткан "Айыл чарбасында климаттын өзгөрүшүнө туруктуу кошумча нарк чынжырчаларын өнүктүрүү" долбоорунун жүрүшү менен таанышты.
Айыл чарба министрлигинин басма сөз кызматы билдиргендей, жумушчу жолугушууга Азия өнүктүрүү банкынын өкүлдөрү, долбоордун жетекчиси Заур Бостанов, ошондой эле талдоочу Айнура Аскарбек катышты.
Жолугушууда Айыл чарба долбоорлорун ишке ашыруу бөлүмүнүн өкүлдөрү долбоордун алкагында аткарылып жаткан иштер, жетишилген жыйынтыктар жана учурдагы иш-чаралар тууралуу маалымат беришти.
Тараптар айыл чарба өндүрүмүн сактоо жана кайра иштетүү боюнча инфратүзүмдү өнүктүрүү, ишкерлерди колдоо жана жеңилдетилген насыялоо механизмдерин өркүндөтүү маселелерине өзгөчө көңүл бурушту.
Мындан тышкары, долбоорду мындан ары ишке ашыруу пландары, учурдагы милдеттер жана кызматташуунун негизги багыттары талкууланды.
