Муром көчөсүн оңдоо үчүн 4 миң чарчыдан ашык жер бошотулат
Бишкекте өтө турган VI Дүйнөлүк көчмөндөр оюндарына даярдыктын алкагында Муром көчөсү толугу менен оңдолууда. Бул тууралуу калаа мэриясынын билдиришти.
Маалыматка ылайык, курулуш иштери жүрүп жаткан аймактагы муниципалдык жерлерде 40тан ашык чарбалык субъектке таандык 80ден ашуун жеңил типтеги объект жайгашкан. Жолду оңдоо долбоорун ишке ашыруу үчүн бул аймактарды бошотуу зарыл болууда.
Бул багытта Жер пайдаланууну көзөмөлдөө боюнча башкармалыктын кызматкерлери объект ээлерине жагдайды түшүндүрүшкөн. Натыйжада алар жүргүзүлүп жаткан иштерди колдоп, ээлеп турган жер тилкелерин бошотууга макул болушканы айтылды.
Жалпысынан Муром көчөсүн оңдоп-түзөө үчүн 4 миң чарчы метрден ашык муниципалдык жер бошотулат.
Мэрия шаардык инфраструктураны өнүктүрүүгө түшүнүү менен мамиле жасап, колдоо көрсөткөн тургундарга жана ишкерлерге ыраазычылык билдирди. Бул иштер жол тармагын жакшыртууга жана шаарды көрктөндүрүүгө багытталганы белгиленди.
