Улуттук статистика комитетинде сандар менен мамлекеттик тилдин айкалышы талкууланды
Кыргыз Республикасынын Улуттук статистика комитетинде «Кыргыз Республикасынын мамлекеттик тили жөнүндө» конституциялык Мыйзамдын жана Министрлер Кабинетинин мамлекеттик кызматкерлердин мамлекеттик тилди билүү деңгээлин аныктоого байланыштуу токтомунун аткарылышына арналган жыйын болду.
Жыйынга Улуттук статистика комитетинин төрагасы Бактыбек Кудайбергенов, Президентке караштуу Мамлекеттик тил жана тил саясаты боюнча улуттук комиссиянын төрагасы Мелис Мураталиев, ошондой эле мекеменин жетекчилери жана аймактык бөлүмдөрдүн өкүлдөрү катышты.
Иш-чаранын жүрүшүндө Тил комиссиясынын төрагасы Мелис Мураталиев мамлекеттик тилди коргоодон мурда аны кеңири колдонуу маанилүү экенин белгилеп, кыргыз тилин расмий иш кагаздарында, статистикалык маалыматтарда жана санариптик платформаларда колдонуу зарылдыгына токтолду.
Мындан тышкары, мамлекеттик тилди өнүктүрүүгө багытталган жаңы санариптик продуктылар жана технологиялык чечимдер тааныштырылды. Адистердин айтымында, мындай инструменттер кыргыз тилинин санариптик чөйрөдөгү мүмкүнчүлүктөрүн кеңейтүүгө өбөлгө түзөт.
Жыйындын жыйынтыгында мамлекеттик тил саясатын ишке ашыруу боюнча иштерди күчөтүү, тил мыйзамдарынын аткарылышын көзөмөлдөө жана статистикалык органдарда кыргыз тилинин колдонулушун кеңейтүү боюнча биргелешкен чечимдер кабыл алынды.
