1-июлдан тарта кыргызстандыктарды кандай өзгөрүүлөр күтөт?
2026-жылдын 1-июлунан тарта Кыргызстанда социалдык төлөмдөрдөн тартып транспорт, миграция жана такси тармагына чейин бир катар жаңы өзгөрүүлөр күчүнө кирет. Алардын айрымдарын эске салабыз:
- 1-июлдан баштап, Президенттин Жарлыгынын негизинде өлкөдө “Бала ырысы” мамлекеттик жөлөк пулу күчүнө кирип, 3 жашка чейинки бардык балдарга, үй-бүлөнүн кирешесине карабастан, ай сайын 1200 сомдон каражат төлөнө баштайт.
- 1-июлдан Бишкек шаарындагы муниципалдык автобустарда жол кирени накталай төлөө токтотулат. Эми жүргүнчүлөр жол акысын банк карталары, QR-код, транспорттук карталар жана башка электрондук төлөм каражаттары аркылуу төлөй алышат.
Ошондой эле ушул күндөн тарта борбор калаада түнкү автобус каттамдары ишке кирип, коомдук транспорт болжол менен 40 мүнөт аралык менен жүрө баштайт.
- 1-июлунан тартып Россия Федерациясына визасыз кирген өлкөлөрдүн жарандары, кыргызстандыктар үчүн жаңы талаптар киргизилет:
- RuID мобилдик тиркемесин жүктөп алуу;
- тиркемеде каттоодон өтүү;
- сапардын максатын, кирүү жана чыгуу күндөрүн көрсөтүү;
- сүрөтүн, биометрикалык маалыматтарын жана үн жазуусун жүктөө;
- чек арадан өтүү үчүн QR-код алуу.
- 1-июлдан тарта Кыргызстанда такси кызматын көрсөтүүгө коюлган талаптар күчөтүлөт. Расмий каттоосуз жүргүнчү ташыган айдоочулар мыйзам чегинде жоопкерчиликке тартылат.
Ошондой эле такси айдоочулары медициналык жана техникалык кароодон үзгүлтүксүз өтүүгө милдеттүү. Ал эми иштөөгө керектүү документтерди эми атайын мобилдик тиркемелер аркылуу жөнөкөйлөтүлгөн тартипте тариздөөгө болот.
