Айлана-чөйрөнү булгагандарга 1 млн сомго жакын айып пул салынды
1-июндан 1-июлга чейинки мезгил аралыгында Экологиялык жана техникалык көзөмөл кызматынын тескөөчүлөрү тарабынан жаратылышты коргоо мыйзамдарынын жана жаратылышты пайдалануу чөйрөсүндөгү мыйзамдардын талаптарын аныктоо, алдын алуу жана бөгөт коюу максатында рейддик иш-чаралар жүргүзүлдү.
Экологиялык жана техникалык көзөмөл кызматынын маалыматына ылайык, өткөрүлгөн иш-чаралардын жүрүшүндө жаратылышты коргоо мыйзамдарынын жана жаратылышты пайдалануу жаатындагы мыйзамдардын талаптарын бузуу боюнча көптөгөн фактылар аныкталды. Аталган фактылар боюнча жалпысынан 78 административдик протокол түзүлдү.
Салынган административдик айып пулдардын жалпы суммасы 929 000 сомду түздү.
Экологиялык жана техникалык көзөмөл кызматы экологиялык мыйзамдардын талаптарынын сакталышын камсыздоо багытында системалуу иштерди улантууда. Ысык-Көл облусунун аймагында айлана-чөйрөнү коргоо, жаратылыш ресурстарын сарамжалдуу пайдалануу, экологиялык укук бузуулардын алдын алуу жана бөгөт коюу максатында рейддик иш-чаралар туруктуу негизде жүргүзүлүп келет.
Кызмат жарандарды, юридикалык жактарды жана ишкердик субъекттерин жаратылышты коргоо мыйзамдарынын талаптарын так сактоого, айлана-чөйрөгө аяр мамиле кылууга жана жаратылыш ресурстарына, ошондой эле аймактын экологиялык коопсуздугуна зыян келтирүүчү мыйзам бузууларга жол бербөөгө чакырат.
