Бишкекте Борбордук Азиянын өнөр жайын өнүктүрүү боюнча аймактык форум өтөт
2026-жылдын 5-ноябрында Бишкекте Борбордук Азиядагы өнөр жай трансформациясы жана инвестиция тартуу маселелерине арналган Өнөр жайды өнүктүрүү боюнча регионалдык форум өтөт. Иш-чараны Кыргызстандын Министрлер Кабинети жана Бириккен Улуттар Уюмунун Өнөр жайды өнүктүрүү боюнча уюму (ЮНИДО) уюштурат. Бул тууралуу Экономика жана коммерция министрилигинен кабарлашты.
Форумга мамлекеттик органдардын, эл аралык финансылык институттардын, өнүктүрүү боюнча өнөктөштөрдүн, жеке сектордун жана академиялык коомчулуктун өкүлдөрү катышып, Кыргызстандын жана Борбордук Азиянын артыкчылыктуу өнөр жай демилгелери, аларды ишке ашырууга инвестиция, каржылоо жана техникалык эксперттик колдоо тартуу мүмкүнчүлүктөрү талкуулашат.
Форум Кыргыз Республикасы үчүн 2025–2029-жылдарга карата Өлкөлүк өнөктөштүк программасынын алкагында өткөрүлөт. Аталган программа Министрлер Кабинетинин жетекчилиги астында ЮНИДО менен өнөктөштүктө ишке ашырылууда.
Иш-чарада төмөнкү беш багытка көңүл бурулат:
- айыл чарба продукциясын кайра иштетүү жана нарк чынжырларын өнүктүрүү;
- кайра жаралуучу энергетика жана өнөр жайды жашыл трансформациялоо;
- өнөр жайдагы санариптик көндүмдөрдү жана инновацияларды өнүктүрүү;
- өнөр жайдын атаандаштыкка жөндөмдүүлүгүн жогорулатуу жана туруктуу нарк чынжырларын өнүктүрүү;
- сапат инфраструктурасын жана рынокторго жеткиликтүүлүктү жакшыртуу.
Мындан тышкары, Борбордук Азиядагы өнөр жайды өнүктүрүүнүн мүмкүнчүлүктөрү жана көйгөйлөрү каралат. Региондук кызматташтыкты күчөтүү, технологияларды өткөрүп берүү, чек ара аралык өндүрүштүк байланыштарды өнүктүрүү жана өнөр жайды жашыл трансформациялоого инвестиция тартуу маселелерине өзгөчө көңүл бурулат.
