Ат-Башыда үрөн сактоочу агро борбордун курулушу башталды
3-июлда президент Садыр Жапаровдун тапшырмасынын негизинде Ат-Башы районунда өлкөдөгү алгачкы заманбап үрөн сактоочу агро борбордун курулушуна мезгил кутусу салынды. Бул тууралуу Ат-Башы райондук мамлекеттик администрациясынын басма сөз кызматы билдирди.
Долбоор Суу ресурстары, айыл чарба жана кайра иштетүү өнөр жайы министрлиги тарабынан ишке ашырылууда. Салтанаттуу иш-чарага Суу ресурстары, айыл чарба жана кайра иштетүү өнөр жайы министринин биринчи орун басары Илич Марсбек уулу, “Кыргыз Агрохолдинг”ААКнын башкы директору Данил Жумабаев, президенттин Нарын облусундагы ыйгарым укуктуу өкүлү Нурбек Сатаров, Ат-Башы райондук мамлекеттик администрациясынын башчысы Мухтар Шербаев, ошондой эле жергиликтүү тургундар катышышты.
Бул ири инвестициялык долбоор президенттин Ат-Башы районунун эли менен болгон жолугушуусунда берилген тапшырманын негизинде жүзөгө ашырылууда. Заманбап агро борбор үрөндүк картошканы эл аралык талаптарга ылайык сактоо, сорттоо жана логистикалык кызматтарды көрсөтүү менен ата мекендик үрөнчүлүктү өнүктүрүүгө жана айыл чарба тармагына жаңы мүмкүнчүлүктөрдү түзөт.
Долбоорду өз мөөнөтүндө баштоо үчүн Ат-Башы райондук мамлекеттик администрациясы тарабынан курулуш жүргүзүлүүчү жер тилкеси ыкчам бөлүнүп берилип, бардык керектүү архитектуралык жана уруксат берүүчү документтер кыска мөөнөттө даярдалды.
Аталган борбордун негизги максаты – Ат-Башыда өндүрүлгөн картошканы жана үрөндүк картошканы заманбап шартта сактоо менен анын сапатын жоготпой ички жана тышкы рынокторго, анын ичинде экспортко чыгарууга шарт түзүү.
