Бишкектеги оңдоп-түзөөдөн өтүп жаткан мектептер текшерилди
2-июлда Бишкек шаарынын мэринин орун басарынын милдетин убактылуу аткаруучу Рахат Мусаева Бишкек шаарынын мэриясынын Билим берүү департаментинин жетекчилиги, Октябрь райондук муниципалдык администрациясы, Капиталдык курулуш башкармалыгы, ошондой эле “Бишкекжашылкурулуш”, “Тазалык” жана “Бишкекасфальтсервис” муниципалдык ишканаларынын өкүлдөрү менен биргеликте 2026–2027-окуу жылына даярдык көрүүнүн алкагында борбор калаадагы билим берүү уюмдарында жүргүзүлүп жаткан оңдоо жана курулуш иштеринин жүрүшүн текшерди.
Бишкек шаардык мэриясынын маалыматына ылайык, текшерүүнүн жүрүшүндө Октябрь районунда жайгашкан 10 билим берүү объектиси каралды. Капиталдык жана учурдагы оңдоо иштеринин, жаңы объектилердин курулушунун жана аймактарды көрктөндүрүү иштеринин аткарылышы текшерилди. Тактап айтканда, объектилерде имараттарды капиталдык оңдоо, чатырларды алмаштыруу, жылытуу, электр менен камсыздоо жана ички канализация системаларын оңдоо, санитардык түйүндөрдү жаңылоо, ашканаларды жана кир жуучу жайларды оңдоо, кошумча окуу корпусун куруу, балдар жана спорт аянтчаларын куруу, өрткө каршы тепкичтерди орнотуу, асфальт төшөө, сугат тармактарын жүргүзүү жана айлана-чөйрөнү комплекстүү көрктөндүрүү иштери аткарылууда.
Ошондой эле билим берүү уюмдарынын санитардык абалына, аймактарды көрктөндүрүүгө, жашыл бак-дарактарды сактоого, курулуш-монтаж иштеринин сапатына, бекитилген графиктердин сакталышына, объектилердин жаңы окуу жылына даярдыгына жана бала бакчалардын тарбиялануучулары менен мектеп окуучулары үчүн коопсуз жана ыңгайлуу шарттарды түзүүгө өзгөчө көңүл бурулду.
Жыйынтыгында тиешелүү кызматтарга жана подряддык уюмдарга бардык пландалган иштерди өз мөөнөтүндө бүтүрүү жана аныкталган кемчиликтерди жоюу боюнча тиешелүү тапшырмалар берилди.
