Лейлектин Мурас айылына таза суу берилди
3-июлда, Баткен облусунун Лейлек районундагы Мурас айылында “Климаттын өзгөрүшүнө туруктуу суу чарба кызматтарын жакшыртуу” долбоорунун алкагында ичүүчү суу менен камсыздоо тутуму пайдаланууга берилди.
Айыл чарба министрлигинин маалыматына ылайык, долбоордун натыйжасында айылдагы 537 кожолукта жашаган 3 500гө жакын тургун сапаттуу жана коопсуз ичүүчү суу менен камсыз болду.
Оңдоп-түзөөгө чейин 2002-жылы курулган суу менен камсыздоо системасы эскирип, суу график боюнча гана берилчү. Жаңылоо иштеринин жыйынтыгында айыл тургундары сутка бою таза ичүүчү суу менен камсыз болуп, санитардык-гигиеналык шарттар жакшырды жана суу чарба инфраструктурасынын туруктуулугу жогорулады.
Ичүүчү суу менен камсыздоону жана саркынды сууларды чыгарууну өнүктүрүү департаментинин директору Зарылбек Каратаев калкты сапаттуу ичүүчү суу менен камсыз кылуу мамлекеттин артыкчылыктуу багыттарынын бири экенин белгилеп, мындай долбоорлор айылдардын туруктуу өнүгүүсүнө жана калктын жашоо сапатын жакшыртууга өбөлгө түзөрүн айтты.
Долбоор Дүйнөлүк банктын колдоосу менен Суу ресурстары, айыл чарба жана кайра иштетүү өнөр жайы министрлигинин жана Ичүүчү суу менен камсыздоону жана саркынды сууларды чыгарууну өнүктүрүү департаментинин кызматташтыгында ишке ашырылды.
