Айыл чарба министрлигине тийиштүү кызматтарга 12 унаа тапшырылды
Суу ресурстары, айыл чарба жана кайра иштетүү өнөр жайы министри Эрлист Акунбеков министрликтин карамагындагы мекмелерге жана илимий мекемелерге жаңы кызматтык жеңил унаалардын ачкычтарын салтанаттуу түрдө тапшырды.
Айыл чарба министрлигинин маалыматына ылайык, иш-чара мамлекеттик мекемелердин материалдык-техникалык базасын чыңдоо жана кызматкерлердин ишинин натыйжалуулугун жогорулатуу максатында өткөрүлдү.
Жалпысынан 12 жаңы кызматтык автотранспорт Жерди жана сууну көзөмөлдөө кызматына, Ичүүчү суу менен камсыздоо жана саркынды сууларды чыгарууну өнүктүрүү департаментине, "Асыл тукум жылкы чарбасынын мамлекеттик холдинги" мамлекеттик мекемесине, ошондой эле Кыргыз дыйканчылык, мал чарба жана жайыттар, ветеринардык жана ирригация илимий-изилдөө институттарына тапшырылды.
Министр белгилегендей, жаңы кызматтык унаалар аймактардагы кызматтык иш сапарларды ыкчам уюштурууга, көзөмөл жана мониторинг иштеринин сапатын жогорулатууга, ошондой эле илимий жана өндүрүштүк милдеттерди натыйжалуу аткарууга өбөлгө түзөт.
