Мамлекетке келтирилген 2 млн сомдон ашык зыян кайтарылды
Кочкор райондук прокуратурасы тарабынан 2025-жылдын жыйынтыгы менен коррупцияга каршы аракеттенүү багытында комплекстүү иштер жүргүзүлүп, мамлекеттик органдарда мыйзамдардын талаптарынын аткарылышына көзөмөл күчөтүлдү. Бул тууралуу Кочкор райондук прокуратурасы билдирди.
Маалыматка ылайык, 2025-жылдын 12 айында райондук прокуратура тарабынан жалпысынан 34 текшерүү жүргүзүлүп, анын жүрүшүндө 101 мыйзам бузуу аныкталды. Аларды четтетүү үчүн 10 сунуштама жана 5 талап келтирилип, 79 укук бузуу боюнча өндүрүш иши, ошондой эле 3 коррупциялык жана кызматтык кылмыш иши козголду.
Прокурордук чаралардын натыйжасында мамлекетке келтирилген зыяндын орду толтурулуп, бюджетке 2 миллион 672 миң 377 сом акчалай каражат өндүрүлдү. Мындан сырткары, 100 миллион 809 миң 760 сомдук материалдык зыян накталайтүрүндө кайтарылды. Ошондой эле 34 кызмат адамы тартиптик жоопкерчиликке тартылып, 79 кызматкерге административдик айып салынды.
Жүргүзүлгөн талдоо көрсөткөндөй, мыйзам бузуулардын басымдуу бөлүгү жергиликтүү өз алдынча башкаруу органдарында, аткаруу бийлигинин аймактык түзүмдөрүндө жана жергиликтүү мамлекеттик администрацияларда катталган. Мындан тышкары, укук коргоо органдарында жана сот органдарынын аппаратында да коррупциялык мүнөздөгү мыйзам бузуулар аныкталган.
Бул багытта 17 текшерүү жүргүзүлүп, 79 мыйзам бузуу аныкталып, алардын ар бири боюнча укук бузуу жөнүндө өндүрүш иштери козголуп, күнөөлүү кызматкерлер административдик жоопкерчиликке тартылышты.
Ошондой эле коррупцияны алдын алуу жөнүндө мыйзамдын талаптарынын аткарылышына өзгөчө көңүл бурулуп, 6 текшерүүнүн жыйынтыгында 10 мыйзам бузуу аныкталды. Алар боюнча прокурордук чаралар көрүлүп, бир кылмыш иши козголду. Натыйжада мамлекетке дээрлик 101 миллион сомдон ашык материалдык зыян өндүрүлүп, 23 кызмат адамы тартиптик жоопкерчиликке тартылды.
