Ошто 382 окуучунун туулгандыгы тууралуу күбөлүгү жок экендиги аныкталды
Акыйкатчы Институтунун текшерүүсүнөн кийин Ош шаардык мэриясынын алдындагы балдар иштери боюнча комиссиясынын кезексиз жыйыны өтүп, анда атайын мекемелер аралык жумушчу топ түзүлдү. Бул тууралуу Акыйкатчы Институтунан билдиришти.
Белгилей кетсек, Акыйкатчынын Ош облусу боюнча ыйгарым укуктуу өкүлүнүн кызматкерлери март-апрель айларында окуучулардын укуктарынын сакталышын текшерүү максатында үч шаардык мектепте мониторинг жүргүзүшкөн.
Текшерүүнүн жыйынтыгында 382 окуучунун туулгандыгы тууралуу күбөлүктөрү жок экендиги аныкталган. Алардын ичинен 187 бала М. Турсунзаде атындагы №13 мектепте, 112 бала Х. Тажиматов атындагы №57 мектепте, дагы 83 бала “ВЛКСМ” мектебинде окушат.
Алардын ичинен 92 окуучу 9-классты аяктап жаткандыктан, өздүгүн тастыктаган документтери жок болгондугуна байланыштуу негизги жалпы билим тууралуу күбөлүк ала албай калуу коркунучу бар болчу.
Текшерүүнүн жүрүшүндө Билим берүү министрлиги документи жок окуучуларга убактылуу шарттуу персоналдык идентификациялык номер ыйгарып, автоматташтырылган маалыматтык тутумга каттаганы белгилүү болду.
Мониторингдин жыйынтыгында Акыйкатчы институту Ош шаардык мэриясына, ошондой эле президенттин Ош облусундагы ыйгарым укуктуу өкүлүнө документтештирүү маселесин тез арада чечүү жана балдардын укуктарын камсыз кылуу боюнча бардык чараларды көрүү боюнча сунуштарды жөнөттү.
