6-июлда Кемин районунун Чоң-Кемин айыл өкмөтүнө караштуу Шабдан айылынан агып өткөн Чоң-Кемин дарыясынын суусунун агымынын күчөшүнөн улам оң жээкти суу жеп, жээк эрозиясы пайда болгон. Натыйжада №32 жол тейлөө кызматынын карамагындагы Кемин – Шабдан унаа жолунун 41-чакырымында жайгашкан көпүрөгө коркунуч жаралган.

ӨКМдин маалыматына ылайык, учурда кырдаал толугу менен көзөмөлдө. Жеринде Суу коргоо кызматынан 1 экскаватор жана Чоң-Кемин айыл өкмөтүнөн 2 экскаватор тартылып, жээкти бекемдөө иштери жүргүзүлүүдө. Мындан тышкары, 7-июлда №32 жол тейлөө кызматынан 1 автокран жана 1 “Хово” үлгүсүндөгү жүк ташуучу унаа тартылып, жээкти бекемдөө үчүн чоң көлөмдөгү ФСК бетон блоктору жеткирилет.

Жеринде Өзгөчө кырдаалдар министринин орун басары Нурбек Жумалиев, Чүй облусундагы ыйгарым укуктуу өкүлүнүн биринчи орун басары Белек Сакиев, Өзгөчө кырдаалдар министрлигинин Чүй облусу боюнча башкармалыгынын башчысы, Чолпонбек Боскунчиев, ошондой эле ӨКМдин Мониторинг жүргүзүү жана божомолдоо департаментинин өкүлдөрү жана тиешелүү кызматтар тарабынан кырдаалга үзгүлтүксүз мониторинг жүргүзүлүп, мындан аркы тобокелдиктерге баа берүү жана алдын алуу иш-чаралары аткарылууда.