Ошто 3 ири инфраструктуралык долбоор курулат
7-июлда президенттин Ош облусундагы ыйгарым укуктуу өкүлү Аманкан Кенжебаев жана президенттин өзгөчө тапшырмалар боюнча атайын өкүлү Бакыт Төрөбаев Кара-Суу жана Өзгөн райондорундагы стратегиялык маанидеги 3 объекти жеринен карап, долбоорлордун жүрүшү менен таанышышты. Бул тууралуу облустук өкүлчүлүктөн билдиришти.
Маалыматка ылайык, Куршаб айыл аймагын айланып өтүүчү 8 км жол курулат. Жол Куршабдагы тыгынды азайтуу жана жол коопсуздугун жогорулатуу үчүн салынат. Азыркы тапта, алдын ала схема даяр болуп, долбоордук-сметалык документтер иштелип жатат. Мамлекеттик экспертизадан өткөндөн кийин курулуш башталат.
Экинчи долбоор Кара-Суу районундагы Мады айылында 153,9 га өнөр жай аймагына Логистикалык борбор куруу. Учурда 153,9 га жер "өнөр жай" категориясына которулду. 6 га жерге арматура чыгаруучу заводдун курулушу башталды. Негизги тоскоолдук – ички жолдор, аларды куруу иштери башталды.
3- долбоор Курбан-Кара айылынан “Ынтымак” КППге чейинки жолду оңдоп-түзөө. Жаңы асфальт төшөө, тротуар жана лоток салуу, жарыктандыруу орнотуу. Бул жол «Ынтымак» чек ара пункту ишке киргенден кийин жүк жана жүргүнчү ташууну жеңилдетип, Кара-Суу районунун транспорттук мүмкүнчүлүгүн арттырат.
Бул долбоорлор Ош облусунун транспорттук-логистикалык мүмкүнчүлүктөрүн кеңейтип, социалдык-экономикалык өнүгүүгө зор салым кошот.
