Ош, Жалал-Абад, Баткен облустарында жер титирөө катталды
Улуттук илимдер академиясынын Сейсмология институтунун маалыматы боюнча, кечээ кечинде Кыргызстанда эки жер титирөө болду.
Маалыматтарга ылайык, биринчи жер титирөө 8-июлда саат 1:54тө катталып, анын күчү 4 баллды түзгөн. Жер титирөөнүн эпицентри Тоскоол айылынан түштүк-батышка 7 чакырым, Майлуу-Суу шаарынан түштүк-чыгышка 22 чакырым жана Манас шаарынан түндүк-батышка 35 чакырым алыстыкта болгон.
Тоскоол, Кара-Булак, Гелеген айылдарында жер титирөөнүн күчү 4 баллга жеткен. Эски-Массы, Алма, Кызыл-Октябрь, Массы, Совет айылдарында 3,5 балл;
Майлуу-Суу шаарында жана Базар-Коргон, Кочкор-Ата, Үч-Булак айылдарында 3 балл; Ал эми Арсланбап, Жай-Терек, Манас айылдарында 2,5 балл болгон.
Сейсмологдор да бүгүн саат 4:42де болгон экинчи жер титирөөнү катташты. Анын интенсивдүүлүгү 4,5 баллды түздү.
Жер титирөөнүн очогу Тажикстандын аймагында жайгашкан Кара-Тейит айылынан 40 чакырым түштүк-батышта жана Баткен шаарынан 110 чакырым түштүк-чыгышта.
Жер титирөөнүн күчү Кыргызстандын Кара-Тейит жана Карамык айылдарында 3 баллга, Шибээ жана Кулчу айылдарында 2,5 баллга жеткен.
