Кыргызстанда калктын саны 7,4 миллионго жетти
Улуттук статистика комитетинин маалыматына ылайык, 2026-жылдын башына карата Кыргызстандын калкынын саны 7 миллион 404 миң адамга жетти. Шаар калкынын үлүшү өсүп, 42,3%ды, ал эми айыл калкы 57,7%ды түздү.
2025-жылы өлкөдө калктын өсүү темпи 1,7% деңгээлинде сакталган. Эң жогорку өсүш Бишкек шаарында (2,8%), Ош шаарында (2,6%) жана Баткен облусунда (1,8%) катталса, эң төмөнкү көрсөткүч Ысык-Көл (0,8%) жана Нарын (0,4%) облустарында болгон.
Билдирүүгө караганда, өлкөдө аялдардын саны эркектерге салыштырмалуу бир аз көп. Тактап айтканда, аялдар – 3 млн 740 миң (50,5%), ал эми эркектер – 3 млн 664 миң (49,5%). Бирок Баткен, Ош, Жалал-Абад, Нарын жана Талас облустарында эркектердин саны көбүрөөк.
2025-жылы Кыргызстанда 140,5 миң ымыркай төрөлгөн. Бул көрсөткүч 2021-жылдагы 150,2 миң төрөткө салыштырмалуу төмөн. Төрөлгөн балдардын 51%ы уулдар, 49%ы кыздар болгон.
Ошондой эле энелердин орточо жашы 28,5 жашка жетип, акыркы жылдары жогорулаганы байкалууда. Эң жаш энелер Ош облусунда жашайт, алардын орточо жашы 27,9 жаш. Өспүрүм кыздардын төрөт көрсөткүчү да азайган. 15–17 жаштагы кыздар арасында төрөт деңгээли 2021-жылдагы ар миң кызга 3,5 төрөттөн, 2025-жылы 1,9 төрөткө чейин төмөндөдү.
Ал эми жалпы төрөт коэффициенти 2025-жылы 1000 калкка 19,1 төрөлүүнү түзүп, 2021-жылга салыштырмалуу 12,9%га азайган. Бул көрсөткүч эң жогору Баткен (23,4), Ош (22,1), Жалал-Абад (21,7) жана Нарын (20,8) облустарында катталган.
2025-жылы аймактар боюнча төрөлгөндөрдүн саны (калктын 1000 адамына карата, промилле менен):
