Кырчында коопсуздук чаралары жана экологиялык көзөмөл күчөтүлдү
Ысык-Көл облустук ички иштер башкармалыгынын башчысы Мурат Боронов Кырчын жайлоосуна барып, жайкы туристтик мезгил учурунда коомдук коопсуздукту камсыздоо боюнча жүргүзүлүп жаткан иштерди көзөмөлдөдү.
Облустук милициянын маалыматына караганда, текшерүүнүн жүрүшүндө коомдук тартипти сактоо, укук бузуулардын алдын алуу жана туристтерге сапаттуу тейлөө көрсөтүү боюнча тапшырмалар берилди.
Ошондой эле жыйында Кырчын жайлоосунун жаратылышын коргоо маселесине өзгөчө көңүл бурулду. Жашыл шиберди унаалардын тебелөөсүнө жол бербөө үчүн жол жээктерине атайын эскертүүчү белгилер орнотулду.
Мындан сырткары, Туристтик-экологиялык милициясынын кызматкерлери эс алуучулар арасында өрт коопсуздугун сактоо жана айлана-чөйрөгө аяр мамиле кылуу боюнча түшүндүрүү иштерин жүргүзүп жатышат.
Милиция жашыл шиберге унаа менен кирген жарандарга мыйзам чегинде катуу чаралар көрүлөрүн эскертти.
