Токмоктогу психоневрологиялык мекеменин шарттары жакшыртылат
Эмгек, социалдык камсыздоо жана миграция министрлиги Токмок шаарындагы №1 психоневрологиялык социалдык стационардык мекемеге байланыштуу маалымат боюнча түшүндүрмө берди.
Министрликтин маалыматына ылайык, мекемедеги абалды Акыйкатчы институту 19-майда текшерип, комиссия жашоо шарттары менен таанышып, жашоочулар менен жекече маектешкен. Ошол учурда мекеменин ишине же шарттарына байланыштуу эч кандай даттануу түшкөн эмес.
Ошондой эле текшерүү маалында кызматтык турак үйлөрдүн биринин аймагында канализация түтүгүнүн бүтөлүшүнөн улам саркынды суу топтолгону аныкталган. Мекеме бул боюнча Токмок шаардык мэриясына кайрылып, көйгөй чечилген.
Министрлик мекеменин инфратүзүмүн жакшыртууну улантылып жатканын билдирди. Ага ылайык, төрт кабаттуу турак жай корпусуна жана тамак-аш блогунун имаратын оңдоп-түзөө мерчемделген. Ал эми 2027-жылы канализация тутумун алмаштыруу жана кызматтык батирлердин чатырын оңдоо каралган.
