Үч-Коргон суу сактагычы 817 гектар жаңы жерди сугатка кошууга шарт түзөт
Суу ресурстары кызматынын директору Алмаз Жээналиев Ысык-Көл облусунун Тоң районуна иш сапары менен барып, Үч-Коргон суу сактагычынын курулушунун жүрүшү менен таанышты.
Суу ресурстары, айыл чарба жана кайра иштетүү өнөр жайы министрлигинин маалыматына ылайык, долбоор Ислам өнүктүрүү банкынын каржылоосу менен ишке ашырылууда. Анын алкагында көлөмү 4,3 млн куб метр болгон сезондук жөнгө салуу бассейни курулат.
Долбоор ишке берилгенден кийин 817 гектар жаңы жер өздөштүрүлүп, 4113 гектар сугат жердин суу менен камсыз болушу жакшырат. Ошондой эле Тоң дарыясынын суусун натыйжалуу пайдаланууга жана дыйкандарды туруктуу сугат суу менен камсыздоого шарт түзүлөт.
Иш сапарынын жүрүшүндө Алмаз Жээналиев курулуш иштеринин сапатына жана белгиленген мөөнөттө бүткөрүлүшүнө көңүл буруп, тиешелүү тапшырмаларды берди.
