Баткендеги Маргун суу сактагычында 220 миң куб метр суу топтолду
Президенттин Баткен облусундагы ыйгарым укуктуу өкүлүнүн орун басары Абдирашит Ташбалтаев Лейлек жана Баткен райондорундагы сугат тутумдарынын, ошондой эле курулуп жаткан социалдык жана өндүрүштүк объекттердин абалы менен жеринде таанышты.
Өкүлчүлүктөн билдиришкендей, иш-сапардын жүрүшүндө Лейлек районундагы Кең-Талаа айыл аймагында жайгашкан Дашравад насостук станциясынын иши текшерилди. Учурда станцияда эки агрегат үзгүлтүксүз иштеп, секундасына 500 литр суу берүүдө, дагы бир агрегат кезекте турат.
Андан соң Жаңы-Жер айыл аймагындагы "Арка" насостук станциясындагы абал каралып, эки агрегат аркылуу дыйкандарга секундасына 2 куб метр суу жеткирилип жатканы маалым болду. Зарыл учурда үчүнчү агрегатты ишке киргизүү мүмкүнчүлүгү бар.
Мындан тышкары, Кең-Талаа айыл аймагындагы Маргун суу сактагычынын абалы текшерилип, учурда анда 220 миң куб метр суу топтолгону белгиленди.
Ошондой эле Баткен районунун Самаркандек айылында курулуп жаткан бала бакча менен соода борборунун курулушу көзөмөлдөнүп, иштерди сапаттуу жана өз мөөнөтүндө бүтүрүү тапшырмасы берилди.
Жыйынтыгында Ак-Татыр каналы жана Ак-Сай насостук станциясы аркылуу сугат мезгилинде дыйкандарды суу менен үзгүлтүксүз камсыздоо милдети коюлду.
