Бишкекте кыш заводунан чыккан кара түтүн боюнча текшерүү жүргүзүлдү
Бишкектин "Алтын казык" конушунда жайгашкан кыш заводунан чыккан кара түтүн боюнча социалдык тармактарда тараган видеого байланыштуу тиешелүү органдар текшерүү жүргүзүштү. Бул тууралуу Жаратылыш ресурстары министрлигинин басма сөз кызматы билдирди.
Маалыматка ылайык, Экологиялык мониторинг департаменти жана Экологиялык жана техникалык көзөмөл кызматынын Бишкек шаары жана Аламүдүн району боюнча башкармалыгы заводдун аймагын карап чыгышты.
Белгиленгендей, 17-июлда саат 04:00 чамасында ишкананын жетекчилигинин макулдугу менен ишкана толук текшерилип, атмосфералык абадан лабораториялык изилдөө үчүн үлгүлөр алынды.
Текшерүүнүн жүрүшүндө заводдун аймагында синтетикалык каражаттарды, желим калдыктарын же тиричилик таштандыларын жагуу фактылары аныкталган жок.
Атмосфералык абадан алынган үлгүлөрдүн лабораториялык изилдөөлөрүнүн жыйынтыгы кийинчерээк маалымдалары айтылды.
