Бишкектин тургундары жол, суу жана жер маселелерин көтөрүштү
Бишкек шаарынын мэри Айбек Жунушалиев "Ак-Ордо", "Ала-Тоо" жана "Арча-Бешик" конуштарынын тургундары менен жолугуп, аймактардагы негизги көйгөйлөрдү талкуулады.
Жолугушууда тургундар суу жана канализация тармактарын куруу, жаратылыш газын жеткирүү, жолдорду асфальттоо, коомдук транспортту жакшыртуу, социалдык объектилерди өнүктүрүү жана жер маселелери боюнча сунуштарын айтышты.
Мэр шаардагы бардык жаңы конуштар үчүн быйыл суу менен камсыздоо жана канализация системаларынын долбоорлору даярдалып, ишке ашырыла турганын билдирди.
Ошондой эле Жунушалиев "Ала-Тоо" конушундагы талаштуу жер тилкесин жеринен көрүп, тиешелүү кызматтарга мыйзамдуу чечимдерди иштеп чыгуу жана жолду ачуу боюнча чараларды көрүүнү тапшырды.
Мындан тышкары, "Арча-Бешик" конушунда жер маселелери жана бала бакча курууга бөлүнгөн жер тилкеси каралып, тиешелүү кызматтарга маселени чечүү боюнча тапшырмалар берилди.
