Борбор калаада авариядан улам жарык өчүп, суу берүү үзгүлтүккө учурады
Жарыктын авариялык өчүрүлүшүнө байланыштуу Бишкектеги суу алуучу курулмалардын иши убактылуу токтотулуп, шаар тургундарына таза суу берүүдө үзгүлтүк жаралды.
Бишкек мэриясынын маалыматына ылайык, басымды көтөрүүчү насос станциялары кол менен ишке киргизилип жаткандыктан, электр энергиясы калыбына келгенден кийин акырындык менен суу бериле баштайт.
Учурда "Бишкексууканал" муниципалдык ишканасынын адистери жабдууларды кезектешип иштетип, суу менен камсыздоону калыбына келтирүү иштерин жүргүзүүдө.
Маалыматка караганда, саат 15:30га карата суу алуучу объектилерде жарык четинен берилип, адистер суу тутумун ишке киргизүүнү улантышууда.
Мэрия тургундардан кырдаалга түшүнүү менен мамиле кылып, сабырдуулук көрсөтүүнү өтүндү. Адистер суу менен камсыздоону мүмкүн болушунча кыска мөөнөттө толук калыбына келтирүү үчүн бардык зарыл иштерди аткарып жатышат.
