Быйыл майыптыкты аныктоо боюнча күбөлөндүрүүдөн 21 миң 839 адам өттү
Жыл башынан бери майыптыкты аныктоо боюнча медико-социалдык эксперттик комиссиядан (МСЭК) 21 миң 839 жаран өттү. Бул өткөн жылдын ушул мезгилине салыштырмалуу 2%га же 438 адамга көп.
Эмгек, социалдык камсыздоо жана миграция министрлигинин маалыматына ылайык, МСЭК тутумун өркүндөтүү, кызмат көрсөтүүлөрдү санариптештирүү жана майыптыкты аныктоо жол-жоболорун жакшыртуу боюнча иштер жүргүзүлүүдө.
Быйылкы жылы аталган тутумга бир катар өзгөртүүлөр киргизилип, документ алуу жөнөкөй болуп, саны алтыдан экиге чейин кыскарды. Кызматтар "Түндүк" электрондук тиркемесине жайгаштырылды.
Санариптештирүүнүн натыйжасында жарандар майыптык тууралуу маалымкатты жана жеке реабилитациялоо (абилитациялоо) программасын онлайн түрүндө ала алышат.
Ошондой эле жыл башынан бери майыптыгы бар 20 506 жаран катталды. Алардын ичинен 5 276 адамга майыптык биринчи жолу белгиленсе, 15 230 адамга кайрадан аныкталды.
Мындан тышкары, 20 862 жаранга жашоо шартын жакшыртууга жана коомго аралашуусуна багытталган программалар иштелип чыкты.
