Ысык-Атада бактарды мыйзамсыз кыйган жаран 95 миң сом доого жыгылды
Ысык-Ата районуна караштуу Ивановка айылында бак-дарактарды мыйзамсыз кыюу фактысы аныкталды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Экологиялык жана техникалык көзөмөл кызматынын Чүй регионалдык башкармалыгынын тескөөчүлөрөрү жүргүзгөн текшерүүнүн жыйынтыгында мыйзам бузууга жол берген айыл тургунуна өсүмдүктөр дүйнөсүнө келтирилген зыян үчүн 95 миң 369 сом өлчөмүндө доо эсептелип, аталган сумма толугу менен өндүрүлдү.
Мындан тышкары, жаранга жаратылышты коргоо жаатындагы мыйзамдардын талаптарын сактоо боюнча түшүндүрүү иштери жүргүзүлүп, мындан ары мыйзамсыз бак-дарактарды кыюуга жол бербөө тууралуу расмий эскертүү берилди.
Экологиялык жана техникалык көзөмөл кызматы жарандарды жаратылыш байлыктарын сактоого жоопкерчилик менен мамиле кылууга жана экологиялык мыйзам талаптарын так аткарууга чакырат.
