Бишкекте FIFA 2026 дүйнө чемпионатынын финалы чоң экрандан көрсөтүлөт

2026-жылдын 19-июлунда саат 21:00дө Бишкектеги Ала-Тоо аянтында FIFA 2026 футбол боюнча дүйнө чемпионатынын финалдык беттеши чоң LED-экран аркылуу түз көрсөтүлөт. Бул тууралуу шаар мэриясынын басма сөз кызматынан кабарлашты.

Маалыматына ылайык, иш-чара Кыргыз футбол биримдигинин колдоосу менен «Шоро» компаниясы уюштурган Legend Fan Festival фан-зонасынын расмий ачылышынын алкагында өтөт.

Финалдык оюн башталганга чейин шаар тургундары жана коноктору үчүн концерттик программа уюштурулат. Анда Ulukmanapo, Jax 02.14, Freeman 996, Бегиш, Баястан, Бек Борбиев, Ния, Афток жана белгилүү диджейлер өнөр көрсөтүшөт. Ошондой эле интерактивдүү аянтчалар, сынактар, белектердин ойнотулушу жана фуд-корт иштейт.

Иш-чарага байланыштуу саат 19:00дөн тартып Чүй проспектисинин Эркиндик бульварынан Орозбеков көчөсүнө чейинки бөлүгү, ошондой эле Орозбеков жана Раззаков көчөлөрүнүн Чүй проспектисинен Эмгек даңкы аянтына чейинки бөлүгүндө унаа кыймылына убактылуу чектөө киргизилет.

Бишкек мэриясы шаар тургундарын жана конокторун дүйнө чемпионатынын финалын бирге көрүүгө чакырууда.