Кыргызстанда экологиялык прокуратура иштеп жатат
Кыргызстанда Президенттин демилгеси менен 2026-жылдын 26-июнунан тартып Бишкек жана Ош экологиялык прокуратуралары ишин баштап, азыр тийиштүү багыттагы тапшырмалар аткарылып жатат. Бул тууралуу Бишкек экологиялык прокурору Кубанычбек Нуруллаев билдирди.
Адистин айтымында, Бишкек экологиялык прокуратурасы - Бишкек шаары, Чүй, Ысык-Көл, Нарын жана Талас облустарын көзөмөлдөйт. Ал эми Ош экологиялык прокуратурасы Ош, Жалал-Абад жана Баткен облустарында иш алып барат. Экологиялык прокуратуранын негизги 3 милдети бар:
- айлана-чөйрөнү жана жаратылыш ресурстарын коргоо боюнча мыйзамдардын аткарылышын көзөмөлдөө;
- экологиялык мыйзам бузууларды аныктоо жана келтирилген зыяндын ордун толтурууну камсыз кылуу;
- жарандардын экологиялык укуктарын коргоо.
Учурда Бишкек экологиялык прокуратурасы Ысык-Көлдөгү эс алуу жайларынын саркынды сууну тазалоочу курулмаларга туташкан же туташпаганадыгын текшерүү иштери жүрүп жатат.
Прокурордун маалыматына ылайык, азыр Ысык-көл областынын аймагында жалпы 1267 обьект болсо, ошонун (20%ы) 251 объектиси саркынды сууларды тазалоочу система менен камсыз болгон. 5 объект борборлоштурулган саркынды сууларды тазалоо түйүнүнө кошулган, ал эми калганы кадимки септик менен гана камсыздалышкан. Бул албетте, саркынды суунун кумга сиңип, жер астындагы суулар аркылуу Ысык көлгө агып келишине шарт түзүшү мүмкүн. Ошондуктан бул мыйзам бузууларды четтетүү боюнча тийиштүү органдарга сунуштар берилип жатат.
