Россиядагы өрттөн Кыргызстандын эки жараны жабыркаган
Кыргызстандын Россиядагы элчилиги 18-июлда Москва облусунун Электросталь шаарында жана Тамбов облусунун Котовск шаарында болгон өрт кырсыктарынан жабыркаган кыргызстандыктар боюнча маалыматты тактоону улантууда.
Элчиликтин маалыматына ылайык, 20-июлга карата Кыргызстандын эки жараны ар кандай деңгээлдеги жаракаттарды алышкан. Алардын абалы канааттандырарлык деп бааланып, учурда Электросталь шаарындагы ооруканада дарыланып жатышат. Элчиликтин кызматкерлери жабыркагандардын жакындары менен жолугуп, консулдук-укуктук жардам көрсөтүштү.
Учурда каза болгондордун арасында Кыргызстандын жарандары бар экендиги тууралуу расмий маалымат түшө элек.
Ошондой эле 18–19-июлда элчиликтин ишеним телефонуна жакындары менен байланыша албай жаткан жарандар боюнча кайрылуулар түшкөн. Кийинчерээк алар туугандары менен байланышкан.
Өрттөн кийин документтери жана жеке буюмдары жоголгон, бирок эвакуацияланып чыккан эки кыргызстандыкка Кыргызстанга кайтуу үчүн күбөлүк документтери таризделди.
Эске салсак, 18-июлга караган түнү Москва облусунун Электросталь жана Тамбов облусунун Котовск шаарларындагы Wildberries логистикалык комплекстерине учкучсуз учуучудан сокку урулган. Анын кесепетинен Электростальда бир адам каза болуп, 50дөн ашык адам жаракат алса, Котовскто жети кызматкер каза болуп, дагы 24 адам жаракат алгандыгы маалымдалган.
