Соң-Көлдөн синтетикалык балык уулоочу тор чыгарылды
Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын тескөөчүлөрү “Кара-Тал-Жапырык” мамлекеттик жаратылыш коругунун кызматкерлери менен биргеликте Соң-Көл көлүндө эки күндүк рейддик иш-чара өткөрүштү. Рейддин жүрүшүндө жалпы узундугу 6 250 метрди түзгөн мыйзамсыз салынган эски синтетикалык балык уулоочу торлор алынып чыкты.
Жаратылыш ресурстары, экология жана техникалык көзөмөл министрлигинин маалыматына ылайык, иш-чара президенттин 17-июлундагы жарлыгын ишке ашыруунун алкагында жүргүзүлдү. Соң-Көл – Кыргызстандын өзгөчө баалуу жаратылыш мурастарынын бири. Көлдүн экологиялык тең салмактуулугун сактоо, суу биологиялык ресурстарын коргоо жана мыйзамсыз балык уулоонун алдын алуу мамлекеттик органдардын артыкчылыктуу милдеттеринин бири болуп саналат.
Жаратылыш ресурстары министрлигине караштуу Экологиялык жана техникалык көзөмөл кызматы жарандарды экологиялык мыйзамдардын талаптарын так сактоого, жаратылыш байлыктарына аяр мамиле кылууга жана аларды келечек муундар үчүн биргелешип коргоого чакырат.
