“Түндүк” аркылуу алдануудан, сак болуңуз!
Алдамчылар жарандарды алдап, маалыматына жана акчасына ээ болуу үчүн мамлекеттик кызматтарга жана банктарга болгон ишенимди колдонуп жатканы белгилүү болду. ИИМдин Киберкоосуздук башкармалыгынын маалыматына ылайык, алар азыр “Түндүк” тиркемесинин атынан телефон чалуу ыкмасын пайдаланып жатышат.
Билдирүүгө ылайык, алгач шылуун тигил же бул мамлекеттик органдын же “Түндүк” тиркемесинин атынан чалып, тиркемени тез арада жаңыртуу же маалыматтарды ырастоо керектигин айтат. Анан сүйлөшүү учурунда шилтеме жөнөтүп, аны менен өтүүгө ынандырат.
Андан кийин экинчи чалуу болуп, бул ирет банктын коопсуздук кызматы катары өздөрүн тааныштырышат. Ал “шектүү операция” тууралуу билдирип, каражаттарды коргоо үчүн акчаны “коопсуз эсепке” которуу же “Түндүк” тиркемеси аркылуу насыя алууга коюлган өзүн-өзү чектөөнү өчүрүп салуу керектигин ынандырат.
Ушуга байланыштуу тартип сакчылар - “коопсуз эсеп” деген болбостугун, банк жана мамлекеттик органдар тиркемелерди жаңыртуу үчүн шилтемелерди жөнөтүп, акча которууну, SMS-коддорду айтууну же коргоо функцияларын өчүрүүнү суранышпастыгын билдиришүүдө.
Эгерде ушундай телефон байланышуулар болсо:
- Телефон аркылуу сүйлөшүү учурунда келген шилтемелерге өтпөңүз.
- Тастыктоо коддорун айтпаңыз.
- Насыяларга коюлган өзүн-өзү чектөөнү өчүрбөңүз.
- Күмөн саноолор пайда болсо, сүйлөшүүнү аяктап, банкка же мамлекеттик органга расмий номер боюнча байланышыңыз.
