Россиядагы 194 кыргыз жаранына төлөнбөй келген эмгек акысы өндүрүлүп берилди
КРнын Эмгек, социалдык камсыздоо жана миграция министрлигинин РФгы Өкүлчүлүгү Кыргызстандын жарандарынын эмгек жана социалдык укуктарын коргоо боюнча системалуу иштерди улантып, алардын Россиянын аймагындагы эмгек ишмердүүлүгүнө жана жүрүүсүнө байланышкан маселелерин чечүүгө көмөк көрсөтүүдө.
Министрликтин басма сөз кызматы, 2026-жылдын башынан бери өкулчүлүк тарабынан 194 жаранга мурда төлөнбөй калган эмгек акысы өндүрүлүп бергендигин жана анын жалпы суммасы 14 373 900 рублду түзгөндүгүн маалымдады.
Билдирүүгө караганда, Өкүлчүлүк өндүрүштө алган жаракаттын кесепетинен ден соолугуна зыян келтирилген Кыргызстандын үч жаранына иш берүүчүлөрдөн компенсация өндүрүп алууга көмөк көрсөткөн. Бул төлөнгөн компенсациянын жалпы суммасы 4 550 000 рублду түзгөн.
КРнын жарандарынын укуктарын жана мыйзамдуу кызыкчылыктарын коргоо максатында Өкүлчүлүк жыл башынан бери 397 жолу Москва шаарынын аймактык полиция бөлүмдөрүнө, Москва шаарынын жана Москва облусунун миграция маселелери боюнча бөлүмдөрүнө, ошондой эле райондор аралык прокуратураларына байланышка чыгышты. Бул иш-чаралар укуктук жана консультациялык жардамга муктаж болгон 843 КРнын жаранынын кайрылуусунун негизинде жүргүзүлгөн.
