Жасалма интеллект кайсы кесиптерге болгон суроо-талапты азайтты?
Жасалма интеллекттин өнүгүшү айрым кесиптерге болгон суроо-талапты азайтып жатат. Бул тууралуу Эмгек министрлигинин Иш менен камсыз кылууга көмөктөшүү башкармалыгынын жетектөөчү адиси Садаткул Мукамбетова "АКИpress" агенттигине берген маегинде билдирди.
Анын айтымында, кесиптер толугу менен жоголбойт, бирок айрым кызматтар автоматташтырылууда.
Учурда маалыматтарды кол менен киргизүү боюнча адистерге, кассирлерге, колл-борборлордун операторлоруна, баштапкы деңгээлдеги бухгалтерлерге, жөнөкөй тексттерди которгон котормочуларга жана жөнөкөй контент даярдоочуларга, туристтик агенттерге, кампадагы айрым кызматкерлерге жана жөнөкөй операцияларды аткарган банк кызматкерлерине болгон суроо-талап төмөндөп баратканы белгиленди.
Ошол эле учурда адис жасалма интеллект адамдарды толугу менен алмаштырбай турганын белгилеп, чыгармачылыкты, аналитикалык ой жүгүртүүнү, адамдар менен түз иштөөнү жана татаал чечим кабыл алууну талап кылган кесиптерде адамдын ролу маанилүү бойдон каларын айтты.
