Кыргызстан менен Өзбекстандын жарандары 15 күн каттоосуз жүрө алышат
Кыргызстан менен Өзбекстан эки өлкөнүн жарандары үчүн чек арадан өткөндөн кийин каттоого туруу талаптарын жеңилдетүү боюнча макулдашты.
Тиешелүү протокол Ысык-Көлдө Кыргызстандын Президенти Садыр Жапаров менен Өзбекстандын президенти Шавкат Мирзиёевдин сүйлөшүүлөрүнүн жыйынтыгында белгилүү болду.
Жаңы тартипке ылайык, Кыргызстандын жана Өзбекстандын жарандары башка өлкөнүн аймагына кирген күндөн тартып 15 күндүн ичинде туруктуу же убактылуу каттоодон өтүү милдетинен бошотулат.
Буга чейин Кыргызстандан Өзбекстанга барып 3 күндөн кийин, ал эми Өзбекстандан Кыргызстанга кирип 5 күн ичинде каттоого туруу зарыл болгон.
