Бажы кызматынын имаратынан өрт чыкты
2-августта Мамлекеттик бажы кызматынын борбордук аппаратынын имаратында капиталдык оңдоо жана курулуш иштери жүргүзүлүп жаткан ашкананын жана машыгуу залынын чатырынан өрт чыккан. Бул тууралуу Бажы кызматынан билдиришти.
Маалыматка караганда, окуя болгон жерге Өзгөчө кырдаалдар министрлигинин 6 өрт өчүрүүчү бөлүмү жана тиешелүү ыкчам кызматтар дароо келишкен. Өрт саат 17:54тө чектөөгө алынып, толугу менен өчүрүлгөн.
Өрттүн кесепетинен ашкананын жана машыгуу залынын чатыры жабыркаган. Мамлекеттик бажы кызматынын Борбордук аппаратынын негизги имараты өрттөн жабыркаган эмес. Кызматтык бөлмөлөргө жана документтер сакталган архивге өрт жеткен жок.
Өрттүн келип чыгуу себептери учурда тиешелүү компетенттүү органдар тарабынан аныкталууда.
