Корук жана улуттук парктардын аянтын кыскартууга тыюу салуу сунушталды
Кыргызстанда мамлекеттик жаратылыш коруктарынын, улуттук парктардын жана башка өзгөчө корголуучу жаратылыш аймактарынын аянтын кыскартууга, ошондой эле алардын коргоо макамын төмөндөтүүгө 20 жылдык мораторий киргизүү сунушталды.
Долбоор коомдук талкууга чыгарылды. Ага ылайык, мораторий күчүнө кирсе, мамлекеттик органдарга жана жергиликтүү өз алдынча башкаруу органдарына өзгөчө корголуучу жаратылыш аймактарынын чек араларын өзгөртүүгө, аянтын кыскартууга же коргоо категориясын төмөндөтүүгө жол берилбейт.
Ошол эле учурда айрым учурлар өзгөчө тартипте каралат. Аларга жаратылыш аймактарынын аянтын кеңейтүү, табигый кырсыктардын кесепеттерин жоюу жана Министрлер Кабинетинин өзүнчө чечими менен мамлекеттик коопсуздук жана коргонуу муктаждыктарына байланышкан өзгөчө жагдайлар кирет.
Документтин негизги максаты - Кыргызстандын жаратылыш мурастарын сактоо, биологиялык ар түрдүүлүктү коргоо жана экосистемалардын туруктуулугун камсыз кылуу экени айтылды.
