УКМКнын жасалма күбөлүгүн пайдаланып акча талап кылган адам кармалды
Бишкекте өзүн укук коргоо органынын кызматкери катары тааныштырып, жарандан акча талап кылууга шектелген адам кармалды.
Бишкек шаардык Ички иштер башкы башкармалыгынын маалыматына ылайык, шектүү шектүү жабырлануучуну жоопкерчиликке тартуу менен коркутуп, ай сайын 5 миң доллар берүүнү талап кылган.
Коркутуудан улам жабырлануучу ага 150 миң сом накталай акча берип, дагы 70 миң сомду банктык эсепке которгон. Кийин шектүү кошумча 200 миң сом талап кылган.
Ыкчам иш-чаранын жүрүшүндө ал 21 миң сом алып жаткан жеринен кармалды. Тинтүү учурунда аскер кызматкеринин жана УКМК кызматкеринин күбөлүктөрү табылган.
Бул факты боюнча кылмыш иши козголуп, шектүү эки айга №1 тергөө абагына камалды. Учурда анын ушул сыяктуу башка кылмыштарга тиешеси бар же жок экени текшерилүүдө.
