Аравандын Сырт айылына 109 млн сомдук мектеп курулууда
Курулуш, архитектура жана турак жай-коммуналдык чарба министрлиги тарабынан Ош облусунун Араван районунун Сырт айылында жаңы мектептин курулушу жүрүүдө. Долбоор республикалык бюджеттин эсебинен каржыланып, жалпы наркы 109 миллион сомду түзөт.
Курулуш, архитектура жана турак жай-коммуналдык чарба министрлигинин маалыматына ылайык, мектеп заманбап талаптарга жооп берген эки кабаттуу имарат болуп курулду. Анда 150 окуучуга ылайыкталган 6 окуу классы, химия, биология жана физика сабактары үчүн лабораториялар, эмгек бөлмөлөрү, китепкана, ашкана, жыйындар залы жана бардык шарттары каралган спорт залы жайгаштырылат. Имараттын жалпы аянты 1630 чарчы метрди түзөт.
Учурда объекттин чатыры жабылып, сырткы жылуулоо иштери аткарылып, ички жасалгалоо жумуштары жүргүзүлүүдө.
Курулуш-монтаждоо иштери Курулуш министрлигинин алдындагы Турак жай-жарандык курулуш департаменти тарабынан туруктуу көзөмөлдөнүп, аткарылып жаткан иштердин сапаты текшерилүүдө.
Жаңы мектептин курулушу аймактагы билим берүү инфраструктурасын жакшыртып, окуучулардын заманбап шартта билим алуусуна өбөлгө түзөт.
