Гемодиализ кызматындагы мыйзам бузуулар 226 млн сомдон ашык зыян алып келди
Башкы прокуратура бюджеттик программалык гемодиализ кызматтарын көрсөтүүдө аныкталган мыйзам бузуулар боюнча кылмыш ишин козгоду.
Маалыматка ылайык, текшерүүдө медициналык документтерге жана "Гемодиализ" автоматташтырылган маалыматтык тутумуна анык эмес маалыматтар киргизилгени аныкталган.
Тактап айтканда, Кыргызстандан тышкары жүргөн жана каза болгон бейтаптарга гемодиализ жүргүзүлгөнү тууралуу маалыматтар катталган. Техникалык жактан мүмкүн болбогонуна карабастан бир аппаратта бир убакта бир нече процедура өткөрүлгөн жана айрым жеке медициналык уюмдар лицензиялык мүмкүнчүлүктөн ашык кызмат көрсөткөн.
Башкы прокуратуранын маалыматына караганда, натыйжада мамлекетке 226 млн 967 миң сом өлчөмүндө зыян келген.
Аталган иш боюнча жооптуу кызмат адамдарына Кылмыш-жаза кодексинин коррупция жана шалаакылык беренелери менен кылмыш иши козголуп, тергөө иштери жүрүп жатат.
