Кадамжайда балдардын коопсуздугу боюнча маселелер талкууланды

Кадамжай районунда сууга чөгүү учурларын алдын алуу, үй-бүлөлүк зомбулукка каршы күрөшүү жана 2026–2027-окуу жылына даярдык боюнча жыйын өттү. Бул тууралуу аймактык башкармалыктан билдиришти.

Жыйынды райондук мамлекеттик администрация башчысынын орун басары Мирланбек Айтматов өткөрдү. Ага билим берүү, маданият, ички иштер бөлүмдөрүнүн өкүлдөрү жана жергиликтүү өз алдынча башкаруу органдарынын жетекчилери катышты.

Жыйындын жүрүшүндө жайкы эс алуу мезгилиндеги балдардын коопсуздугун камсыздоо, сууга чөгүү фактыларын алдын алуу боюнча аткарылып жаткан иштер талкууланды.

Ошондой эле үй-бүлөлүк зомбулуктун алдын алуу чараларын күчөтүү жана билим берүү мекемелеринин жаңы окуу жылына даярдыгы боюнча маселелер каралды.

Жыйынтыгында тиешелүү жетекчилерге белгиленген багыттар боюнча тапшырмалар берилди.