Каракол токой чарбасында мыйзам бузуу фактысы аныкталды
Жаратылыш министрлигине караштуу Экологиялык жана техникалык көзөмөл кызматы тарабынан Каракол токой чарбасында текшерүү жүргүзүлдү. Текшерүүнүн жыйынтыгында туристтик-рекреациялык багытта иш алып барган ижарачылардын келишимдик талаптарды аткарбагандыгы аныкталып, административдик протокол түзүлдү.
Экологиялык жана техникалык көзөмөл кызматынын маалыматына ылайык, токойду коргоо жана жакшыртуу боюнча талаптарды бузгандыгы үчүн Каракол токой чарбасынын үч кызматкерине карата административдик чаралар көрүлүп, тиешелүү айып пулдар салынды. Жалпы айып пулдардын суммасы 62 миң сомду түздү.
Мындан тышкары, Жергез токой чарбасындаТянь-Шань карагайынын 42 мыйзамсыз кыйылган дүмүрү аныкталды. Анын ичинен 14 өсүп турган карагайлар, ал эми 28 даанасы шамалдан кулаган карагайлар мыйзамсыз кыйылганы белгилүү болду. Өсүмдүктөргө келтирилген зыяндын көлөмү 83 миң 262 сом түзүп, мыйзамсыз ташылып кеткен жыгачтын жалпы көлөмү 18,02 куб метрди түздү.
Учурда чогултулган бардык материалдар укуктук баа берүү үчүн укук коргоо органдарына өткөрүлүп берилди.
