Кыргызстанды күйүүчү май менен камсыздаган компаниялардын өкүлдөрү менен жолугушуу болду
Министрлер Кабинетинин төрагасынын орун басары Эрлист Акунбеков Кыргызстанда күйүүчү-майлоочу материалдар менен иш жүргүзгөн компаниялардын жетекчилери менен жолукту. Бул тууралуу президенттик админстрациядан маалымдашты.
Маалыматка ылайык, отурумда негизинен өлкөгө мунай заттарын импорттоо боюнча түзүлгөн жаңы келишимдердин аткарылышы, ички жана эл аралык рыноктордо күйүүчү-майлоочу материалдар боюнча түзүлүп жаткан жалпы кырдаал каралды. Ошондой эле, компания жетекчилери өздөрүнүн кампаларындагы мунай продуктуларынын коруктарынын өлчөмү жана аткарылып жаткан иштер тууралуу маалымат беришти.
Талкуунун соңунда МинКаб төрагасынын орун басары Эрлист Акунбеков өлкөнүн ички рыногун күйүүчү-майлоочу май менен жеткиликтүү деңгээлде камсыздоо максатында мамлекеттик субсидия убагында берилип жатканын, ошол себептүү компаниялардын аймактардагы бардык май куюучу жайлары толук кандуу иштеп, эч кандай чектөөлөр болбошу керектигин билдирди.
Аны менен катар мунай продуктуларын импорттоо боюнча жаңы келишимдерди түзүү жана алардын аткарылышын ыкчамдатуу, абалга байланыштуу аткарылып жаткан жалпы иштерди жана мониторингди күчөтүү сыяктуу бир катар протоколдук тапшырмалар тиешелүү мамлекеттик органдарга берилди.
