Өзбекстандан алынып келинген пияз өлкө аймагына киргизилген жок
“Достук” карантиндик фитосанитардык көзөмөл өткөрүү пунктунда Өзбекстандан импорттолуп келе жаткан 24 770 кг пияз өлкөгө киргизилген жок. Бул тууралуу Айыл чарба министрлигинен билдиришти.
Маалыматка ылайык, текшерүүнүн жүрүшүндө продукциянын таңгагында Евразия экономикалык бирлигинин фитосанитардык талаптарына ылайык милдеттүү маркировкалоо белгилери жок экендиги аныкталды.
Мыйзам талаптарына ылайык жүктү Кыргызстандын аймагына киргизүүгө уруксат берилбей, тиешелүү фитосанитардык чаралар көрүлүп, жүк экспорттоочу өлкөгө кайра кайтарылды.
Өсүмдүктөрдү химиялаштыруу, коргоо жана карантини боюнча Ош башкармалыгы мамлекеттик фитосанитардык көзөмөлдү күчөтүлгөн тартипте жүргүзүүнү улантып, өлкөнүн фитосанитардык коопсуздугун камсыз кылуу боюнча иштерин үзгүлтүксүз жүргүзүүдө.
