Өзгөндүн тургуну алма сактоочу ири борбор курууга мамлекеттик колдоо сурады
Суу ресурстары, айыл чарба жана кайра иштетүү өнөр жайы министри Эрлист Акунбеков Ош облусунун тургундарын кабыл алып, алардын көйгөйлөрүн укту.
Айыл чарба министрлигинин басма сөз кызматы билдиргендей, Өзгөн районунун тургуну алма сактоочу ири транспорттук-логистикалык борбор куруу үчүн мамлекеттик каржылык колдоо керек экенин айтты.
Маалыматка ылайык, министр бул багытта мамлекеттик банктар менен биргеликте мүмкүнчүлүктөрдү карап чыгуу боюнча тиешелүү түзүмдөргө тапшырма берди.
Ошондой эле Чоң-Алай районунун тургундары мал сатуу үчүн өткөрүп берүүчү аймак уюштурууга жер тилкесин бөлүп берүү өтүнүчү менен кайрылышты.
Аталган маселе боюнча Эрлист Акунбеков тиешелүү жетекчилерге мыйзам талаптарына ылайык ылайыктуу жер тилкесин аныктап, маселени кароону тапшырды.
