Садыр Жапаров геологиялык парктар тууралуу мыйзамга кол койду
Президент Садыр Жапаров “Кыргыз Республикасындагы геологиялык парктар жөнүндө” мыйзамга кол койду.
Президенттин администрациясынын маалыматына ылайык, мыйзам өлкөдө геопарктардын улуттук тармагын түзүүгө, уникалдуу геологиялык объекттерди сактоого жана туруктуу туризмди өнүктүрүүгө багытталган.
Документ геопарктарды түзүүнүн, алардын иштөөсүнүн, чек араларын өзгөртүүнүн жана жоюунун укуктук негиздерин аныктайт.
Ошондой эле мындай аймактарды пайдалануу жана коргоо тартиби белгиленет.
Мыйзамга ылайык, геопарк түзүү тууралуу сунуштарды мамлекеттик органдар, жергиликтүү өз алдынча башкаруу органдары, илимий мекемелер жана коомдук уюмдар тиешелүү илимий негиздеменин негизинде бере алышат.
