Экологиялык талаптарды бузган полигонго 23 миң сом айып пул салынды
Экологиялык жана техникалык көзөмөл кызматынын Жалал-Абад регионалдык башкармалыгы тарабынан жүргүзүлгөн көзөмөл иш-чараларынын жүрүшүндө Тогуз-Торо районунун Каргалык айыл аймагындагы катуу тиричилик калдыктарын таштоочу жайда өрт чыккандыгы аныкталды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Текшерүүнүн жыйынтыгында таштанды полигонун эксплуатациялоодо экологиялык талаптардын сакталбаганы белгилүү болду.
Аталган факт боюнча Кыргыз Республикасынын Укук бузуулар жөнүндө кодексинин 115-беренесинин 3-бөлүгүнө ылайык полигонду иштеткен жооптуу жакка 23 миң сом өлчөмүндө айып пул салынды.
Ошондой эле таштанды таштоочу жайда чыккан өрт толугу менен өчүрүлүп, тиешелүү чаралар көрүлгөнү маалымдалды.
