Бишкектеги бир катар объектилер текшерилди
5-августта Бишкек шаарынын мэри Айбек Жунушалиев борбор калаадагы билим берүү мекемелерин жана жол-транспорт инфраструктурасынын объектилерин кыдыруу аркылуу алардын курулуш жана оңдоо иштеринин жүрүшүн жеринен текшерди. Бул тууралуу Бишкек шаардык мэриясынан билдиришти.
Маалыматка караганда, алгачкы текшерилген объект №57 жалпы орто билим берүү мектеби болду. Бул жерде Капиталдык курулуш башкармалыгы тарабынан имаратка капиталдык оңдоо иштери жүргүзүлүүдө. Учурда бузуу иштери толугу менен аяктап, чатырын жабуу, ички дубалдарды шыбоо жана фасаддын темир каркасын орнотуу иштери жүрүп жатат.
Шаар башчысы курулуш иштерин жүргүзүүдө балдардын коопсуздугу жана ыңгайлуулугу эң башкы орунда турушу керектигин белгилеп, мектептин учурдагы тосмосун заманбап темир тор тосмо менен алмаштырууну тапшырды.
Экинчи объект катары Жаш Гвардия бульвары менен Шабдан Баатыр көчөлөрүнүн кесилишиндеги жаңы транспорттук түйүндүн жана көпүрөнүн курулушу каралды. Азыркы учурда подрядчы уюм келечектеги транспорттук түйүндүн тирөөчтөрүн куруу иштерин аткарууда.
Мэр жээкти бекемдөө иштери менен катар дарыя боюнда шаар тургундары үчүн сейилдөө жана эс алуу аймагын түзүү мүмкүнчүлүгүн карап чыгууну тапшырды. Ошондой эле подрядчы уюмга кошумча жумушчу күчтөрдү тартуу жана курулуштун темпин тездетүү, ал эми райондук администрациянын башчысына иштердин жүрүшүн туруктуу көзөмөлдөө милдети жүктөлдү.
Үчүнчү объект болуп №131 бала бакчанын кошумча корпусунун курулушу текшерилди. Бул жерде темир-бетон каркасы тургузулуп, дубалдары кыш менен тургузулуп, электр монтаждоо иштери аяктаган. Учурда чатырын жабуу жана ички жасалгалоо иштери уланууда.
Текшерүүнүн жыйынтыгында шаар башчысы бала бакчанын тосмосун заманбап темир тор тосмо менен алмаштырууну, имараттын чатырын жаңылоо маселесин иштеп чыгууну жана курулуш иштеринин темпин күчөтүүнү тапшырды.
